Маңдайшасына «Кумыс хана» деп жазып қойыпты

22.08.2016
Қаралды: 1984

Жуырда «Қостанай – Астана» тас жолы арқылы Астраханка ауылынан Елордаға келе жатқанбыз. Астана қаласына кіре берісте жүргізуші бір жерге аялдады. 

Ұзақ жолдан шаршағандықтан біз де сыртқа шықтық. Адамдар жиылып тұрған жердің маңдайшасындағы «Кумыс хана» деген жазуды байқадық. Сұрастырсақ, ол жерде қымыз сатылады екен.

Астана бойынша мұндай қымыз сататын жерлер аз болғандықтан жеткізілген қымыз тез таусылса керек. Түске дейін алғандар алады, үлгермегендер кейінге қалады.

Жақын барып, кәуап пісіріп тұрған жігіттен қымыз сұрадық. Оның қазақ еместігі біздің сұрағымызға: «Кымыз жок», – деп берген жауабынан-ақ байқалды. Кейін оны өзі де мойындады. Жоғарыдағы жазу неге қате жазылған дегенімізде әлгі жігіт: «Бізге осылай әкеліп берген соң іліп қойдық», – дегеннен басқа ештеңе айта алмады.

Бұл жерде адамдардың қай ұлттың өкілі немесе қай елдің азаматы екендігінде тұрған мәселе жоқ. Маңдайшадағы жарнаманы дұрыс жазып қойса болды емес пе? Көпшілік бұл жерді қымызхана емес, күміс сатылатын күмісхана деп ойлап қалуы да мүмкін ғой.

Бұл «Қостанай – Астана» бағытындағы үлкен жол болғандықтан қарапайым шенеуніктерді атамағанда әкімдер мен министрлердің өздері де талай өткен болуы ғажап емес. Сонда олар «Кумыс хана» деген нені білдіреді деп ойламағаны ма? Әлде Астанада мұндай қате жазулар көп болғандықтан ешкім елемейтін болғаны ма?

Әлде астаналықтар үшін қымызды «кумыс» деп жазу сауаттылықты білдіретін болғаны ма?

М. ҰЛЫҚБЕК.

 

Мақаланы көшіргенде Zamana.kz сайтына сілтеме көрсету міндетті!

Пікір қалдыру

1000 символ