Сарыағашта павловния өсірілуде

19.03.2019
Қаралды: 1916

Сарыағаштық кәсіпкер Балтабай Құрбанбаев павловния ағашын өсіруді қолға алды. Ол 2017-жылы Қытай елінен 50 мың түп алдырып, аудандағы бос жатқан 2 гектар жерге отырғызған. Кәсіпкер бұл дарақ ең бағалы ағаштардың бірі екенін айтады.

 

«Павловния ағашы әлемдегі ең жылдам өсетін ағаш деп айтуға болады. Жылына 4-6 метрге дейін өссе, ал бойы 25 метрге дейін жетеді. 6 апта гүлдеп тұрады. Еуропа елдерінде жиһаз жасауға осы ағашты қолданады. Одан бөлек, қайық, шаңғы, теннис ракеткасын, музыкалық аспап, тағы басқа да бұйымдар дайындауға таптырмайтын дүние.

 

Бұл ағашта көз болмайды. Өте иілгіш келеді. Бастапқыда адамдар мұндайға сеніңкіремей қараған. Қазір жан-жақты көз жеткізіп, көшеттерін алып, көбейтуді ойластыруда. Түсінген адамға мұның пайдасы ұшан-теңіз», – дейді Балтабай Құрбанбаев.

 

Кәсіпкердің сөзінше, оңтүстіктің климаты павловния ағашын өсіруге өте қолайлы. Күтімі жақсы болса, 3 жылдан кейін ағашты қажетке жарата беруге болады.

 

Түркістан облысы әкімінің баспасөз қызметі.

Пікір қалдыру

1000 символ