Қой мен сиыр, жылқыға бай «Бердібай»

22.10.2018
Қаралды: 83

«Бердібай» жеке кәсіпкерлігінің басшысы Ғалымжан Бердібаевтың мал басын көбейту ісімен айналысқанына жеті-сегіз жылдай уақыт болған. Қазығұрт ауданындағы Көкібел ауылының тұрғыны 2017-жылдың қыркүйек айында «Ырыс» микроқаржы ұйымынан 5 миллион теңге көлемінде несие алып, оны толықтай кәсібінің дамуына жұмсапты.

 

– Әр басына 250 мың теңгеден есептегенде бұл 20 аналық сиырға арнап берілген қаржы болатын. Мен 24 аналық сиыр алдым. Қазіргі таңда олардың саны 40-қа жуықтап қалды. Оның 20 шақтысы жуық арада бұзаулайды, – дейді Ғалымжан.

 

«Бердібай» жеке кәсіпкерлігі одан бөлек, 300-дей қой, 12 бас жылқы ұстап отыр. 70 бас ірі қара малына арнал­ған қораны былтыр салып қойған болатын. Оның ішін толтырып, қолдағы ірі қара мал басын 70-ке жуықтатсам дейді. Несиеден толық құтылған соң мал бордақылау ісіне көшеміз деген жоспары да бар.

 

– Жылқыларды қорада ұстамаймыз. Далада жайылып жүре береді. Дегенмен бізде жайылымдық жерлер аз. Теледидарда көрсетіп жатқан 2-3 мыңға дейінгі мал ұстап отырған шаруаларға қызыға қарайтыным рас. Бәлкім болашақта сол санның төңірегін жуықтайтын күн бізге туар деп қоямын.

 

Негізі мемлекеттік бағдарламалар шаруалар үшін ыңғайлы екенін айт­қым келеді. Сол арқылы несие алуым маңайдағы көптеген адамның көзін ашып жібергендей болды. «Қалай болады, жолын көрсет» дегендер көбейе бастады. «Барып, құжатыңды өткізсең, бәрі де мүмкін», – деп түсіндіремін.

 

Әу баста, 2016-жылы 20 миллион теңге несие алмақ болғанмын. «Даму» кәсіпкерлікті қолдау қорының арнайы курсын оқып, бизнес-жоспар да да­йындаған едім. Мал тұратын жерім жоқ болғандықтан ойым іске аспады. Ол қора құрылысын әлі бастамаған кезім еді. Бірақ одан кейінгі жоспарларым ақырындап жүзеге аса бастады, – дейді кәсіпкердің өзі.

 

Ғалымжан Бердібаев былтыр жа­йылымдық және суармалы жерлерді ұлғайту мақсатында «Бердібай ата» ауыл шаруашылығы өндірістік ко­оперативін құрған екен. Қазір онда 42 гектарға жуық жер бар. Соның арқасында бүгінде жем-шөп жағынан қиындық көрмей отыр екен.

 

 М. ҚҰРБАНҚЫЗЫ.

 

Мақаланы көшіргенде Zamana.kz сайтына сілтеме көрсету міндетті!

 

 

 

Пікір қалдыру

1000 символ