Төсбелгі алу үшін пара беруім керек пе?

19.12.2017
Қаралды: 217

Мен 81 жастамын. 48 жыл  мұғалім болып істедім. Алдымен қатардағы мұға­лім, кейін 24 жыл оқу ісінің меңгерушісі  қызметін ат­қардым. Тегісшіл ауыл окру­гінен  екі рет селолық Ке­ңес­тің депутаты болып  сайландым.

1989-жылы мектеп ұжы­мы мені «Еңбек ардагері» деген медальге ұсынып, аудандық білім бөліміне жазбаша тапсырған. Кейін тапсырылған құжаттар сол күйін­де жабулы қалды.

Мен медальді бірнеше жылдар бойы күттім. Ақырында 2016-жылдың қазан айында аудан әкімінің орынбасарына  жолығып, жағдайды айтқан болатынмын. Олар мені аудандық оқу бөліміне  ұсыныс жіберіңіз деп шығарып салды.

Арада бір ай өткен соң сол кездегі аудандық білім бөлімінің басшысы Мұрат Маханов­қа жолықтым. Ол кісі мені кадрлар бөліміне апарып, Айбек Тұрсынбаевқа жолықтырды, оған мәселенің мән-жайын айтты. Ол жігіт қандай құжаттар керек екенін қағазға жазып берді.

Айтылған құжаттарды мен екі-үш күнде жинап, арнайы папкаға салып, А.Тұрсынбаев­қа өткіздім. Бұл өткен жылғы қараша айы болатын. Содан бері ай сайын барып тұрдым десем, артық болмас. А.Тұрсынбаев: «Мен сіз берген құжаттардың барлығын облысқа өткіз­дім, енді менің жұмысым бітті», – деп мені шы­ғарып салды.

Содан облыстық білім басқармасы кадр бөлімінің басшысы Әсілов Сейтжанға бірнеше рет телефон соққанымда ол: «Аты-жөніңіз кім еді?» – деп сұрап алды да, кейін телефон тұтқасын көтермей қойды. Бар мәселе осымен шектелді.

Жоғарғы жақтағы мырзалар халықтың арыз-шағымына нақты жауап бермейтініне қынжыламын. Әлде олар менен пара дәметіп отыр ма деген ой келді. Мен ол «Еңбек ардагері» медалі үшін пара бермеймін. Ол маған нан болмайды. Тек балаларым, неме­релерім, яғни ұрпағым көрсе екен деген ниет қана менде.

2015-жылы маған Сарыағаш ауданының Құрметті азаматы атағы берілді. Сондай-ақ Сарыағаш ауданының Құрметті ұстазы медалін алдым. Облысқа еңбек сіңіргенім үшін медаль, Конституцияның 20 жылдығына, Ұлы Жеңістің 60, 65, 70 жылдығына, Ардагерлер ұйымының 20 жылдығына шығарылған медальдер алғанмын. Ал еңбекке терім сіңсе де  «Еңбек ардагері» медалі берілмей отырғаны түсініксіз.

Ендігі жерде ҚР Білім және ғылым министрі Ерлан Сағадиевке, ОҚО білім басқармасының басшысы Исатай Сағындықов мырзалар­ға жазуға тура келеді-ау деймін. Осыларға жаз­ған хаттарымнан бір қорытынды шықса деп үміттенемін.

Пернебай ТЕМІРБЕКОВ,

Сарыағаш ауданының

Құрметті азаматы, байырғы ұстаз.

 

Мақаланы көшіргенде Zamana.kz сайтына сілтеме көрсету міндетті!

Пікір қалдыру

1000 символ