Ақпарат

Әйелмен құның өлшенер

Қаралды: 578

Қай жерде, мейлі, қай елде, 

Әлемнің мәні – әйелде. 

Мықтымын десең ойыңды, 

Әйелге барып дәлелде. 

       Әйелсіз айтпан әнді мен, 

       Әйелмен дәмді әңгімем. 

       Сүйкімді болсаң шынымен, 

       Әйелің сүйсін алдымен. 

Әйелге мәлім көп сырың, 

Сүрінсең – әйел деп сүрін. 

Халыққа сыйлы болмайсың, 

Әйелге болсаң жексұрын. 

       Әйелсіз қонды бақ қашан, 

       Әйел деп түстік отқа сан. 

       Әлемнің тілін таппайсың, 

       Әйелдің тілін таппасаң! 

 

Болмасын әйел назалы, 

Болмасын әйел жазалы. 

Кеудесін қаққан талайдың, 

Әйелден болған ажалы. 

       Әйелден ыстық от бар ма? 

       Әйел деп түстік көкпарға. 

       Қарғағың келсе біреуді, 

       Әйелің өлсін деп қарға. 

Әйелмен құның өлшенер, 

Құдайдан кейін сол – шебер. 

Бақытты сен де болмайсың, 

Әйелің сорлы болса егер. 

       Сырыңды соған ашасың, 

       Шөліңді содан басасың. 

       Адамның күні – Әйелмен, 

       Әйелдер мәңгі жасасын!

Жүрсін ЕРМАН

 

Мақаланы көшіргенде Zamana.kz сайтына сілтеме көрсету міндетті!

Пікір қалдыру