Астанада пәтер жалдап тұратындар – тек қазақтар

17.01.2017
Қаралды: 1995

Тіркелу дегеннен шығады ғой. Осы Астанаға келгелі қаланың бүкіл аудандарында тұрдым, тұрып келе жатырмын да. 

Соның арқасында қазір  Астананы бес саусағымдай білмесем де біреуге жол көрсетіп немесе өз бетімше кез-келген жерін тауып бара беретін халге жеттім.

Кейде көшіп-қонып жүріп осы мен тұрған аудандардың бірінде бір бөлмелі болса да пәтерім болса, бұлай сандалып, әуре-сарсаңға түспес едім деп ойлаймын. Оның орнына әркімге: «Пәтеріңізге бір жылға тіркей тұрасыз ба?» – деп жалынып жүрмін.

«Хозяйкама» айтып едім, басын ала қашты. Ананы айтты, мынаны айтты, әйтеуір тіркемеудің амалын жасады. «Тұрсаң тұр, тұрмасаң қой!» – дейді. Содан, амал жоқ, ішімнен тынып қала бердім.

Мынау үкіметтің «астарлы» саясатының арқасында әлі қанша есік тоздырып, қанша есік қағатынымды бір Құдай білсін. Тек сабыр деп қана өзімді жұбатып қоямын.

Негізі осы Астанада пәтер жалдап тұратын тек қазақтар ғана. Орыстардың пәтер іздеп аяқтан сабылып жүргенін көрмеппін. Кейде қолымды бір сілтеп, кетіп те қалғым келеді. Бірақ қайтадан сабыр-сабыр деп пәтер іздеп күн кешіп жүрмін.

Бұл жағдайдың қашанға дейін жалғасатынын кім білсін...

Арман ДОСАНОВ.

 

Мақаланы көшіргенде Zamana.kz сайтына сілтеме көрсету міндетті!