Жұмбақ таңбалардың сырын ашыпты

23.06.2009 14:12

Бердияр қары Сарманұлы (суретте) – көпшілікке танымал кісі. Ол әбжат ілімін меңгеріп, көп жылдан бері табиғаттың тосын құбылыстарын діни және ғылыми тұрғыда зерттеп келеді. Жақында Бердияр қары ерекше бір тосын жаңалықтың куәсі болып, соның сырын ашуды мақсат тұтыпты.

«20 жыл бойы зерттеулерімді соңғы жылдары халыққа жариялауды қолға алдым. Келешек ұрпақ жеті жалғанда адасып қалмау үшін, Алла жаратқан 18 мың ғаламның адам баласына қалай тәсір ететіні жайлы, яғни әсер ететінін біліп жүрсін деген ниетпен әр сұқбатымда адамдарға пайдалы нәрселерді айтып келемін, – дейді Бердияр қары. – Жақында Шымкент қаласына жақын орналасқан Ошақты елді мекенінде керемет бір жаңалықтың куәсі болдым. Ошақты ауылының іргесіндегі мазараттан ерте заманда өмір сүрген сәуегей-молда, Алланың сүйікті құлы Сәбден бабаның сүйегі табылды. Сәбден баба заманында атақты емші, әрі ғажайып көріпкел-әулие кісі болған. Сәбден әулиенің қасында ұлы Ғалқайыр да жерленіпті. Ғалқайыр өте білімпаз, батыр, әрі әділ кісі болғанын тарихи деректер айтылған. Бұл екі кісінің өмірбаянын Назарбай деген ақсақал жақсы біледі. Ақсақал әлгі қорымның шырақшысы.

Бір қызығы, Назарбай ақсақалдың үйінде соңғы күндері таңғажайып көріністер орын ала бастаған. Оның үйіндегі тауықтар «Аллаһ» деген таңбасы бар жұмыртқаларды туып жатыр. Жұмыртқалардағы таңбаларды көзіммен көріп, қолымен ұстап көрдім. Енді бұл таңбаларды зерттеуді қолға алдым.

Жұмыртқада араб, хансу (Қытайша) әріптері жазылған. Соған қарағанда, Сәбден баба және оның қасында жатқан бір топ ғұлама кісілер араб және хансу тілдерін жетік меңгерген. Сәбден бабаның заманында қандай білімді кісі болғанын әлгі жұмыртқаларда түскен таңбалар арқылы-ақ білуге болады.

Жұмыртқаға таңбалар қалай түскен? Мен енді осы жағын зерделеп көрейін. Бұған дейін Назарбай ақсақал үнемі Сәбден баба жатқан жерді тазалап, шөптерін жұлып ретке келтіріп жүргенде Сәбден әулиеден бөлініп шыққан күшті энергия (ғұламаларда ғарыштан келетін қуатты энергия жоғары болады) Назарбай ақсақалдың денесінде сіңіп отырған. Осы жерде айта кететін бір жайт, қарапайым адамдардың миының салмағы 1200-1280 грамм шамасында болса, ал Алланың сүйікті құлы болған әулие кісілер миының салмағы 1400 граммнан жоғары болады. Егер арнайы аппаратпен қарасаңыз, Сәбден бабаның жатқан жерінде көкпен жалғасқан нұр сызығын байқауға болады. Ал әулиенің айналасында үнемі жұмыс істеп жүрген Назарбай ақсақалдың денесіне нұр сіңіп, кейін қарияның қолынан дән жеген тауықтардың жұмыртқаларында ерекше тылсым құбылыстар байқалған.

Назарбай ақсақал берген ерекше таста қытайша Л – таңбасы белгіленген. Ол «адам» деген мағынаны білдіреді. Ал араб тілінде бұл таңба 8 санын көрсетеді. Құран Кәрімдегі нөмірі 8-ші Мүнафиқун сүресінің 8-ші аятында екіжүзділерге қасиетті жерлерде орын жоқ екенін, олардың ғибадаттары қабыл болмайтыны айтылған. Сондықтан әбжат ілімі бойынша 8 саны кәпірлермен күрес деген мағынасын береді».

Бердияр қары Назарбай ақсақал көрсеткен таңбалы тастарда бұдан да өзге жазулар бар екенін, болашақта олардың жұмбағын шешетінін айтады.

Бетті дайындаған – Әділет МАРАТҰЛЫ.