Қошқарата бойында "Мевлана" деген мейрамхана бар. Онда зәмзәм суы тегін беріледі

08.06.2009 16:15

Жуырда Шымкент қаласында тұңғыш халал мейрамхана ашылды. «Мевлана» деп аталатын жаңа мейрамхана Қошқарата өзенінің қақ ортасындағы кішкентай «аралда» бой көтерді. Біз осы мейрамхананың менеджері Тимур Ділдәбековпен және осындағы қызметкер Гүлмира Жасұзақовамен тілдескен болатынбыз.

«Мейрамхананың қожасы Роза Мейірбекова деген әпкеміз, – дейді Тимур. – Мұндай халал мейрамхана ашу туралы идеяны мен әскерден жаңадан келген кезімде естіген едім. Ондай жерге кім барар екен деген күдігім басым болғаны рас. Содан бірде мен, әкем және қарындасым үшеуміз қалаға бардық. Түстік тамақ ішу үшін дәмханалардың біріне кіргенбіз. Онда біреулер алдарында арағы мен сырасы аралас, көк түтінді будақтатып, қарқ-қарқ күліп, дарылдап отыр екен. Мен мұсылманша мейрамхананың көпшілік үшін қажет екенін сонда ғана қатты сезіндім. Себебі әлгі кісілердің аузына келгенін айтып отырғанын есітіп, қарындасымнан қатты қысылған болатынмын».

Біз «Мевлана» мейрамханасының қызметкерлерімен тілдесіп отырғанымызда алдымызға «подноспен» кішкене ғана екі «рюмка» су әкелінді. Ол Меккеден арнайы алдырылған зәмзәм суы екен. Мейрамханаға келген әрбір адамға зәмзәм суы тегін беріледі.

«Біздің мейрамханаға осыдан үш күн бұрын төлебилік бір отбасы арнайы келіпті, – дейді Гүлмира. – Ерлі-зайыптылардың өте әлжуаз, нәзік баласы бар екен. Баланы бір көрген адам әлі жасына толмаған шығар деп ойлайды. Мұнда келгенде қабағы қатыңқы баланың ештеңеге зауқы соқпай тұрған болатын. Ата-анасы іштей тілектерін айтып, зәмзәм суын балаларына ішкізді. Сонда әлгінде ғана мазасызданып, бабы болмай тұрған бала әп-сәтте көңілденіп шыға келді. Жүгіріп ойнап, мәз болып күліп сала берді. Басында біз бала жүре алмайтын шығар деп ойлағанбыз. Мұндай ғажапқа бәріміз таңырқап, Алла-тағалаға тағы да тәубе дедік. Сөйтсек, ата-анасы мазасызданған әлжуаз баласына зәмзәм суынан шипа болар деп Алладан медет тілеп келген екен. Қайтарында да кішкене қауашаққа екі-үш стакан зәмзәм суынан құйып беруімізді өтінді».

Зәмзәм суын мейрамханаға түркиялық азамат жеткізіп береді екен. Мейрамхана қызметкерлерінің айтуынша, бұл қасиетті су мұнда қысы-жазы үзілмейтін болады.

Сондай-ақ мейрамхананың бас аспазы да намазхан кісі. Ол тамақты өте жақсы дайындайды. Дастархан мәзірінде 30-ға жуық ас түрлері бар екен. Тамақтың барлығы адал бауыздалған мал етінен жасалады. Қойды осы мейрамхананың өзіне әкеліп сойса, жылқы, сиыр еттерін адал бауыздайтын өз таныстарынан барып алып келеді. Мұнда жақсы бапталған қымыз бен қымыранды қанша ішсеңіз де еркіңіз. Мейрамханада темекі тартуға рұқсат етілмейді. Мейрамхананың ішінде намазхана бар. Ал әжетханаларында құман ретінде қолданылатын төмен етіп орналастырылған су ағатын крандар тұр.

Үлкен банкет залына бір мезгілде 120-150 адам қабылданады. Жеке-жеке «кабиналар» да орналасқан. Тағы бір айта кететіні, мұнда кішігірім конференциялар, «дөңгелек үстел» сияқты жиындар өткізуге арналған залдар да бар. Ал мейрамханаға келген кісілердің көліктерін қою үшін 30-ға жуық көлік сиятын автотұрақ жасалған.

Мейрамхана негізінен отбасылық бизнес негізінде құрылыпты. Мақтааралдық Датқаш Орынбаев пен Тапаш Орынбаева деген ерлі-зайыптылардан өрбіген 2 ұл мен 3 қыздың бала-шағасы. Олардың барлығы да намаз оқиды, дәретсіз жүрмейді.

Мұнда әсіресе жұма күні адамдар көп жиналады екен. Орталық мешітке жұма намазға жиналған жамағат осында келіп, демалып, жақсы-жақсы әңгімелер айтып тарасады. Сондай-ақ мейрамханаға арақ-шарапсыз өтетін құдалық, бесік той өткізуге әзірден тапсырыс түсіп жатыр.

Ал мейрамхананың неге «Мевлана» деп аталғанын сұрағанымызда Тимур: «Мевлана деген кісі – Ахмет Йассауи бабамыздың ұстазы. Дін жолында жүрген үлкен ғұлама болған екен. Алғашында мейрамхананы «Ислам» деп атамақ болғанбыз. Бірақ кейін осы атауға тоқталдық», – деді.

Шымкенттегі Қошқарата өзенінің бойында мұсылман қауымына арналған осындай жақсы мейрамхана жұмыс істеп тұр.

Қ. ҚАЛАУОВА.

Пікір қосу

JComments