Қанды қалай тазартуға болады?

Бүгінгі таңда экологиялық таза азықпен тамақтанудың өзі қиындап барады. Сол себепті күнделікті өмірде астан, судан және ауадан адам ағзасы түрлі токсиндермен уланып жатқаны жасырын емес. Адам ағзасына нәр беретін қанның токсиндерден таза болуы денсаулықты жақсартуда үлкен маңызға ие. Ал қан құрамын олардан қалай тазартуға болады? Осы жөнінде біз Оңтүстік Қазақстан облыстық қан орталығы директорының медицина жөніндегі орынбасары, трансфузиолог-дәрігер Жайнар Астанаевамен әңгімелескен едік.

– Жайнар Орынбасарқызы, плазмофорез деген не, осы жөнінде тоқталып өтсеңіз?

– Күнделікті қолданатын тамақ, ауа, су арқылы адам ағзасына тұрақты түрде мыңдаған қажетсіз заттар енеді. Оның қатарында, әрине, улылары да болады. Бұған түрлі күйзелістерді, ұйқының қанбауын, экологиялық жағдайдың қолайсыздығын қосыңыз. Яғни бүйрек, бауыр, өкпе және ағзаның тазалығына жауапты тағы басқа мүшелер өз міндетін толық атқара алмай қалады. Содан ағзаның қорғаныш күші әлсірейді. Міне, сонда ағзаны қажетсіз, улы заттардан тазалау керек болады.

Қанды тазартудың көптеген түрлері бар. Соның ішіндегі ең тиімдісі – плазмофорез. Плазмофорез әдісімен қан тазалау терең жасушалық негізде жүретіндіктен оның әсері жақсы болады.

Бізде Америкадан әкелінген «Гемонетик» деген автоматтандырылған жаңа заманауи аппарат бар. Бұл қондырғымен қан тазарту мейлінше қауіпсіз жағдайда жүзеге асырылады. Себебі дәрігерлер тек тиісті бағдарламаны енгізіп, «бұйрық» беріп отырады. Қалған істің бәрін қондырғы өзі атқарады. Жарты сағаттай уақыт көлемінде 600 миллилитр қан сүзгіштен өткізіліп, тазаланып, өңделіп, қан плазмасы алынып, тазаланған қанды қайтадан өзіне құйып береді.

– Плазмофорездік ем қандай науқастарға ұсынылады?

– Қан тазарту процесі аллергиялық ауруларға, псориаз, экзема сияқты тері ауруларына, эндокринологиялық, тері-венерологиялық ауруларға, демікпеге, гипертониялық ауруларға, буын-буын қақсайтын ревматоидтық артриттерге, қант диабетінің кейбір түрлеріне, ішек құрылысының аурулары сияқты көптеген ауруларға қолданылады.

Қан плазмадан және қызыл түйіршіктерден тұрады. Олардың әрқайсысының өзіндік қызметі бар. Қандағы қызыл түйіршіктер ағза жасушаларына оттегі мен қоректік заттарды жеткізеді. Ал плазма арқылы жасушадан пайдаланылған өнімдер, яғни холестерин қалдықтары және басқа зиянды әрі қажетсіз заттар шығарылады. Бір сөзбен айтқанда, плазманың құрамында ауру қоздыратын инфекциялар жинақталады. Ал плазмофорездік ем кезінде қанның құрамындағы керексіз заттар плазмада тұнып, олар алынып тасталады. Қан тазаланған соң ауырсыну белгілері төмендейді.

– Қан тазаланғаннан кейін науқастың жағдайы қаншалықты жақсарады?

– Мұндай емнен кейін қатты науқастанған жандардың ауруы біршама бәсеңдейді. Науқастың жалпы жағдайы жақсарып, көңіл-күйі сергиді. Ал дені сау адамдар күш-қуатының артқанын бірден сезінеді. Созылмалы шаршауға душар болған жандар қан тазалағаннан кейін жұмысқа деген құлшынысы артқанын байқайды. Жалпы, қан тазарту ешкімге де зиянын тигізбейді. Қан тазаланғаннан кейін адам ағзасы жеңіл жұмыс істеп, олардың бойынан жасару белгілері байқалады.

– Қан тазарту емін қанша жастан бастап жасауға болады?

– Қан құрамын тазартуды жас сәбилерге де жасауға болады. Ол балалар ауруханаларында жасалады. Біздің орталықта дәрігердің кеңесімен 16 жастан асқан кез-келген азаматқа плазмофорездік ем қолданылады.

– Енді мұндай емнің құны қанша екеніне де тоқтала кетсеңіз.

– Бізде емнің бағасы көтерілген жоқ. Биыл да өткен жылғыдай бір сеанстың құны 12 мың теңге.

– Әңгімеңіз үшін рахмет.

Сұхбаттасқан – Қ. ҚАЛАУОВА.

(«Ауырмаңыз!», №02, 2012 ж.)