Жақында базарда Динара есімді танысымызбен кездейсоқ жолығып қалдық. Балаларының мектепке керек-жарағын алып жүрген беті екен. Біздің көріспегенімізге көп болып еді. Амандық-саулықтан соң базар ішіндегі шағын ғана дәмханаға кіріп, өткен-кеткенді айтып біршама уақыт отырдық. Динара әңгіме арасында өзінің үшінші мәрте тұрмысқа шыққанын айтты. Оның бұл жол­ғы тұрмыс құруы адам таңданарлық жағдайда болған екен.

Алып қашып кеткен еді

Динараны бала кезімізден білетін едік. Өзі аса сұлу болмаса да сүйкімді қыз еді. Бір жағынан ол пысық әрі көпшіл, ақкөңіл, аңқылдап қалған қыз болатын. Осы қасиеттері адамды өзіне еріксіз тартып тұратын.

Ол мектепте өте жақсы оқыған. Бірақ университетке оқуға түсе алмай қалды. Оны мектеп бітірген жылы өзінен үш жас үлкен Асанәлі деген жігіт алып қашты. Қарсылық білдіріп, қанша туласа да әйелдер Динараны сол отбасыда қалуға ақыры көндіреді. Оның түскен отбасы бақуат тұратын. Жігіт те жаман болмай шығады. Алғашқыда бәрі жақсы еді, бірақ көп кешікпей күйеуі үйіне ішіп келуді жиілетіпті. Ақырында Динараға тыныштық бермей, қол жұмсай бастайды.­

«Шыдамның да шегі бар емес пе, күйеуім бұл қылығын қой­маған соң мен ол үйден кетіп тындым, – дейді Динара. – Арамызда бір қыз, екі ұл бар еді. Ол кезде олар әлі кішкентай болатын. Күйеуім сот арқылы үш перзентімді де өзіне алып қойды. Қанша әрекет жасасам да сот дауды күйеуімнің пайдасына шешіп берді. Бүгінде күйеуім, ата-енем перзенттерімді сирек көрсетеді. Тіпті оларды маған қарсы етіп тәрбиелеп жатқанын білгенде жүрегім ауырады. Балаларым мені іздейді екен. Өйткені оларға Асанәлінің екінші алған келіншегі күн бермейтін көрінеді. Мен аптасына екі-үш мәрте мектепке ұрланып барып, балаларымды көріп қайтамын. Күйеуімнің ата-анасы мұны білсе мені оңдырмайтын шығар. Себебі олар ба­лаларымды менен қызғанады. Содан, амал жоқ, оларға білдірмей балаларымды көшеде, мектепте ұрланып көріп жүремін...»

Екіншісі де ішкіш екен

Динара бұдан кейін екінші рет тұрмыс­та болыпты. Бірақ бұл жолы да кү­йеуімен дәм-тұздары жараспаған.

«Шымкентте жұмыс істеп жүрген кезім­де Ерлан деген жігітпен танысып, көп кешікпей екеуміз шаңы­рақ көтердік, – дейді Динара­. – Бір өкініштісі, Ерлан да ішімдікке жақын болып шықты. Бір жағынан ол көп өтірік сөйлейтін әрі суық жүрісті екен. Екеу­міз төрт жыл отандасып, ақыры ажырасып тындық. Ол соңымнан қалмай біраз уақыт жүгіріп жүрді. Себебі менің жұмысқа пысық екенімді, әрі ер-азаматты қатты сыйлайтынымды білді. Бірақ «Ауру қалса да әдет қалмайды» демекші, Ерлан арағын тастамаған соң мен онымен ат құйрығын кесісіп тындым».

Содан Динара мектепте оқитын балаларына киім-кешек әперіп, таршылық көрсетпеуді ғана ойлап, күндіз-түні тынбай жұмыс істеумен болады. Бір жағынан үш перзентін өзіне қайтарып алуды мақсат етіп, сотқа беретін ақшаны табуды ғана ойлайды.

«Сотта жеңіп шығу үшін ақша керек екен, – деді Динара әңгімесін жалғастырып. – Қазіргі уақытта ақ­шасыз тір­лігіңді бітіру қиын. Маған қолы ашық бір азамат қомақты ақша ұсынса, оны ең алдымен балаларымды қайтарып алуға жұмсар едім. Ата-анам бар, бауырларым, Құдайға шүкір, көп. Бірақ оларға барып алақан жаюға на­мысым жібер­мейді. Тіпті жеке өміріме де араластырмауға тырысамын. Өйткені бұл менің тағдырым ғой».

Бойдақ жігітпен бас қосыпты

Ерланмен ажырасқанына екі жыл өткенде, биылғы жаздың басында Динара Дәулет деген жігітпен автобуста кездейсоқ танысып қалыпты. Ол Динараны алғаш­қы күні-ақ ұнатып, көп кешікпей оған үйленуге ұсыныс білдіреді.

«Алғашқыда оның ұсынысына жігіттер­дің ке­зекті қулығы ғой деп онша мән бермей жүрдім, – дейді Динара. – Бір жағынан жігіт менен он жас кіші болып шықты. Бір кездесуде суитын шығар деп мен оған бар өмірімді, тіпті үш балам бар екенін де айттым. Бірақ ол сонда да маған сезімін білдіріп, өзіне тұрмысқа шығуымды өтініп жүрді. «Аузы күйген үрлеп ішеді» емес пе, сондықтан оның ұсынысын қабылдамай жүре бердім. Бір жағынан жігіттің ата-анасы, туыстары үш баласы бар әйел деп бетіме салық қыла ма деп ойладым.

Содан бір күні әдеттегідей жұмыстан шығып келе жатқанымда ол мені үйге дейін шығарып салмақ болып, көшеден такси ұстады. Бұған дейін үйге автобуспен баратын едік. Ойымда ештеңе болмастан таксиге міндім. Такси жүз метрдей жүргенде көлікке жол бойынан екі жас жігіт мінді. Осы кезде ғана Дәулет мені алып қашып бара жатқанын айтты. Оның бұл сөзі маған «шок» болып тиді де, әбден туладым. Бірақ ол менің айт­қандарыма құлақ аспастан, ақыры алып қашты. Мен түс көргендей күй кештім...

Жігіттің ата-анасы, туыстары басыма орамал жауып, беташар жасағанда ғана мына оқиғаның түсім емес, өңім екеніне көзім жетті. Көңілім толқып, көзіме еріксіз жас алдым. Басыма жігіттің анасы ақ орамал жапқанда біртүрлі сезімді басымнан өткіздім. Жасым 33-ке келгенде өзімнен 10 жас кіші жігіт алып қашады деп кім ойлаған...

Өмірде бәрі болады екен ғой. Жігіттің ата-анасы маған ақ батасын беріп, некемізді қидырды. Дәулеттің әке-шешесі менің жағдайымды жақсы біледі екен. Жігіттің анасы келіп: «Қызым, адам бол­ған соң қателеспей тұрмайды. Үш балаң бар екен деп бетіңе салық салмаймыз. Баламыз сені қалады ма, онда біздің де қалағанымыз. Баламыздың бақытты бол­ғаны біздің де бақытты болғанымыз. Бізге екеуің тату-тәтті тұрып кетсеңдер болды. Одан басқа ешнәрсе керек емес», – деді. Сосын ол кісі үш баламды қайтарып алуға көмектесетіндерін айтқанда қалай жылап жібергенімді білмей қалдым.

Дәулет үйдің жалғызы. Қаладағы бір фирмада қызмет ат­қарады Тұрмыстары жаман емес. Менің ол үйге келін болып түскеніме енді он күн болды. Осы он күн ішінде ата-енемнің алтын адамдар еке­ніне көзім жетті. Ал күйеуім тіпті жақсы адам болып шықты. Олар мені қатты құрметтейді. Енді мен де жақсы келін болып жүрмін».

Осылай деген Динара сағатына қарап, үйіне қайтуға асықты. Біз он жылдан бері тағдыр тауқы­метін көріп, енді ғана бағы ашылған Динараның өмір бойы бақытты болып өтуін тілеп қала бердік.

Г. САПАР.