Ащы пікірлер де ашық айтылды

17.02.2010 09:40

esep beru Өткен аптада Шымкент қаласының әкімі Арман Жетпісбаев қалалық мәслихаттың кезектен тыс 31-сессиясында қорытынды есеп берді. Оған облыс әкімі Асқар Мырзахметов, облыстық мәслихаттың қаладан сайланған депутаттары, Шымкент қаласының ардагерлері мен Құрметті азаматтары және түрлі партия өкілдері қатысты.

Қала әкімі А.Жетпісбаев қорытынды есеп барысында 2009 жылы өнеркәсіп өнімінің көлемі 1,2 пайызға, орташа айлық жалақы 13 пайызға, жұмыспен қамтылған халық саны 1 пайызға артқаны жөнінде әңгімелеп берді.

2009 жылы қала бюджеті 37 миллиард 492 миллион теңгені құрапты. Оның ішінде өзіндік кірістер 17 миллиард 122 миллион теңге, республикалық трансферт пен кредит 14 миллиард 555 миллион теңге, облыстық трансферт 5 миллиард 815 миллион теңгені құраған.

Осыдан кейін де көптеген игі істерді атап өткен А.Жетпісбаевтың есеп беру қорытындысы бір сағаттан аса уақытты қамтыды.

220 миллионды табу қиын-ау

Мұнан соң «Нұр Отан» ХДП-ның Шымкент қалалық филиалының төрағасы Өмірзақ Мелдеханов сөз сөйледі. «Бұрынғы әкімдерден қалған бір кемшілік бар, – деді Ө.Мелдеханов. – Қаланы қақ жарып өтетін «Жаңа ішек» каналын «Жол картасы» бойынша жөндеу үшін 220 миллион теңге бөлінген. Оны тендерден ұтып алған «Жилстройиндустрия» серіктестігінің бастығы Умида Валиджанова Қазақстанның емес, Өзбекстанның азаматы. Ол азаматша да Өзбекстаннан өзбек ағайындарды әкеліп жұмыс істетеді. Негізі «Жол картасы» бойынша аталмыш каналда біздің 339 адам жұмыс істеуі керек. Өзбек ағайындар жалақыларын Өзбекстаннан алады екен. Сөйтіп, есептеп қарағанда 220 миллион теңгенің қайда кеткенін табу қиын-ау деп ойлаймын. Менің айтайын дегенім, мұндай жұмыстарды өзіміздің азаматтар атқарса, ертеңгі күні сұрауға да жақсы, тексеруге де оңай болар еді»

Үй ала алмай жүрген соғыс ардагері де бар

Мұнан кейін қалалық ардагерлер кеңесінің төрағасы Уәлихан Сүлейменов ақсақалға сөз берілді. Ол кісі мінберге жақындағанда «Регламентпен сөйлеңіз» деген дауыс шықты. Сонда ренжіңкіреп қалған Уәкең: «Нұр Отанға» регламентпен сөйле дей алмайсыңдар, ал қарттарды регламентпен сөйлетіп қоясыңдар ма?!» деп дауыстап жіберді. «Бізде Кеңес Одағының Батыры Қауынбаев деген бір-ақ азамат бар. Ол пәтер сұрап кезекте тұр. Оның кезегі қашан келетіні белгісіз. Осы бір адамға Жеңіс күнінің 65 жылдығының алдында бір пәтер берсек жақсы болар еді. Осы мәселені шешуді сіздерден өтінемін», – деді У.Сүлейменов.

«Нұр-Арыстанға» ешкімнің шамасы келмейді

Осыдан соң «Береке» ЖШС-нің Бас директоры Рәшкүл Оспанәлиева сөз сөйледі. «Тұрғындардың наразылығын туғызатын нәрсе, әкімдер ауысқан сайын жұмысты қала ортасынан бастап, қала сыртында су, жарық секілді мәселелер шешілмей қалып кете береді. Сонымен бірге Президентіміздің тапсырмасымен «Нұрлы көш» бағдарламасы іске асырылуда, оралмандарға көмектесіп жатырмыз. Бұл дұрыс қой. Бірақ 7,5 миллиард теңге бөліп анау «Асар» мөлтекауданынан екі қабатты үйлер салып, суын, газын, жарығын тартып, жағдайын жасап беріп жатырмыз, ал осы жерде отыз жылдан бері тұрып жатқан тұрғындарымыздың суы да жоқ. Сондай-ақ «Цемент» мөлтекауданында да бес мыңдай халық бар. Мен облыстың әкіміне де, қаланың әкіміне де депутаттық сауал жолдадым. Бірақ үшінші әкім ауысып жатыр, мына «Оңтүстік – жарық» пен халықтың арасындағы «Нұр – Арыстан» деген мекемеге ешкімнің шамасы келмейді. «Цемент» мөлтек ауданында кешкі сағат 19.00-ден таңға дейін жарық жоқ».

Электр энергиясын арқалап таси ма?

Осы жиында сөз сөйлеген азаматтардың бірі – «Азат-ЖСДП» Оңтүстік Қазақстан облыстық филиалының төрағасы Жанысбек Өтеген де ащы пікір айтты. «Мынау коммуналдық бағалар қымбаттар кезде қоғамдық тыңдау болуы керек, – деді Ж.Өтеген. – Бізде ондай жоқ. Ойымызды айта алмаймыз. Ал жарықты өндіргеннен гөрі тасыған екі есе қымбат екен. Сонда оны арқалап таси ма?

Екінші мәселе, елде тепе-теңдік болса дейміз. Мысалы қазір сессияға қатысып отырмыз ғой, осы отырған депутаттардың барлығы Асандар, ішінде бір Үсен жоқ. Неге олай? Халық сонда Үсендерді сайламай ма? Тек «Нұр Отанды» сайлай ма?

Келесі айтар мәселе, қаладағы 118 көшеде ат жоқ екен. Бір көшеде ат болмаса ол жердегілер үйлеріне жедел жәрдемді қалай шақырады? (Осы арада мінберде тұрған Жақаң қала әкіміне қарап: «Суыңнан берші, тамағым кеуіп кетті», – деп оның алдындағы суды алды да: «Тек «Нұр Отанға бересіңдер ме?» – деді. Шынында да алдындағы сөйлеген кісілердің барлығына су беріліп жатқан болатын). Шымкент қаласында Абылай ханның аты берілген көше жоқ. Анау «Қорғасын-2»-ден кішкене «тупик» бұйырған. Сәкен Сейфуллинге де 25 метрлік «тупик» бұйырыпты. Ал жерімізді тартып алған Рашидовке үлкен көше берілген. Сонда біз кімді қадірлеп жүрміз?»

Мұнан кейін де бірнеше азаматтар сөйледі. Соңында облыс әкімі А.Мырзахметов мінберге шығып, атқарылған жұмыстардың да, кемшіліктердің де бар екенін айтты. Қала әкімін қатты мақтағандар қатарында елге белгілі азаматтар – Ө.Мелдеханов, Ә.Сұлтанбеков, Ә.Бейсе және басқалар көзге түсті.

С. БАЙБОСЫНОВ.

Пікір қосу

JComments