"Хаммердің" ішінде отырыс жасауға болады

08.06.2009 14:26

Жайма-шуақ жаз келгелі тойдың маусымы басталып кеткендей. Тойлардың арқасында көшеге лимузиндердің түрі-түрі шығуда. Әсіресе сол көліктердің арасында «Hummer» лимузиндері көпшіліктің назарын өзіне ерекше аударады. Оны көрген кейбіреулер: «Осы көлікке қанша адам сияды, 100 шақырымға қанша литр жанармай жейді екен?» деп жүр. Жуырда біз осындай көлік иесі Руслан Бекеновке жолығып, әңгімелескен едік.

«Көлік негізінде «Hummer Н-2» деп аталады, – дейді Руслан. – Салмағы – 6 тонна. Ұзындығы – 1050 сантиметр. Өзі 18 орындық. Моторының күші – 6 куб. 100 шақырымға 30 литр жанармай тұтынады. Жылдамдық ауыстырғышы автоматтық түрде. Бұл көлік АҚШ-та жасалады. Бірақ мұны Германиядан ағаларым әкеліп берді. Олар 150 мың долларға сатып алған. Енді осы көлікпен үйлену тойы, туылған күндерінде «гулянка» жасағысы келгендерге сағатына 200 доллардан қызмет жасаймыз».

Мұнан кейін біз «Hummer Н-2» лимузинінің артқы салонына мініп көрдік. Есікті жапқан кезде іші түн секілді қап-қараңғы болып қалады екен. Жанымдағы Руслан салон ішіндегі сәнді жарықтарын жаққан кезде көлік іші керемет көрінді. Одан кейін: «Ана жаққа қараңыз», – дегенде алдыңғы жағында ішіне ағаш салып жағып қойған орыстың «камин» пешіне көзім түсті. Ол аталмыш пештің электрондық нұсқадағы көрінісі екен. Қала берді, салон ішінде отырыс жасау үшін арнайы сәнді шыны үстелдер, ыдыстар, екі теледидар, төбесінде түнгі аспанның электрондық көрінісі, әуен орталығы, аквариум бар.

Қысқасы, «Hummer Н-2» лимузинінің ішінде кішігірім отырыс ұйымдастыруға болады екен.

Егер қалта көтеріп жатса, аталмыш көлікті үйлену тойы мен туылған күндерінде жалдап, «гулянка» жасағанға не жетсін!

С. САЙЛАУҰЛЫ.

Пікір қосу

JComments