Кешке арналған көйлектер қанша теңге тұрады

22.05.2009 08:56

Дәл қазір жер-жерлерде мектеп бітіруші түлектердің тынымсыз сабақ оқып, тестке дайындалып жатқан уақыты. Сынақтан сүрінбей өткен соң бітіру кешіне деген дайындық басталып кетеді. Ондайда қыздардың кешкі отырысқа киетін киімін таңдау өте қиын. Біз бүгін сол көйлектердің бағасын, сапасын, сәндісін назарларыңызға ұсынғалы отырмыз.

Биылғы жылдың сәнді түсіне сия көк (фиолетовый) түстің еніп тұрғаны белгілі. Қазір базарларда да, киім дүкендерінде де көбіне осы түстегі киімдер сатылуда. Шымкенттегі «Бекжан» базарына кешегі аптада жаңа тауарлардың түсімі болыпты. Саудагерлер көбіне кешкі отырысқа киетін көйлектерді әкелген.

«Түркиядан кеше кешкісін келдім, – дейді Гүлшара Есенбекова есімді кәсіпкер. – Әкелген тауарларымның сапасы да, сыртқы көрінісі де алушылардың көңілінен шығып жатыр. Бағасы айтарлықтай қымбат емес. Мәселен, «гипюр» деген матаға аздап атлас матасын қосып тіккен «Миледи» көйлегін 12 мың теңгеден сатып жатырмыз. Одан арзан көйлектер күнделікті киіске ыңғайлы болғанымен кешкі отырыстарға жараспай қалады.

Түркиялықтар көбіне жібек, атлас, гипюр маталардан көйлек тігеді. Иық жағы ашық, ұзындығы тізеден келетін «Принцесса» көйлегін көбіне 11-ші сынып қыздары алып жатыр екен. Оның сыртқы көрінісі де ерекше. Алдыңғы етегі үш бұрышты болып түскен, атлас матадан тігіліп, беті бисер моншақтармен әрленген көйлектің бағасы 14 мың теңгеден сатылуда.

Қалыңдық көйлектеріне арналған дүкендерде де кешкі отырыстарға киетін көйлектердің кез-келгенін жалға алуға болады. Оларды екі күнге жалға алу бағасы 5 мың теңгеден жоғары. Мұндағы кешкі көйлектерді көбіне тойға барушылар алатын көрінеді. «Қазір бұрынғыдай «бальный», яғни етегі өте кең, қалыңдық көйлегіне ұқсас киімді бітіру кешіне ешкім алмайды, – дейді дүкен сатушысы Диля. – Себебі оның ішінен көйлек әдемі көріну үшін темір юбка кию керек. Онымен жүріп-тұру да, отыру да ыңғайсыз. Сондықтан қыздар етегі қысқа, матасы жұқа көйлектерді таңдауда. Біздің дүкенде ондай көйлектердің түр-түрі бар. Бағасы да көрінісіне, матасына қарай әртүрлі. Жалға алу ақысы 5 мыңнан 20 мың теңгеге дейін».

Шымкентке, басқа да өңірлерге танымал әншілердің көйлегін тігетін Әлия есімді тігіншіге тапсырыс берушілер көбейіпті. Ол кез-келген матадан әдемі, денеге қонымды көйлектерді тіге алады. Әлия басқа тігіншілерге қарағанда тігу ақысының жоғары екендігін айтты.

«Дүкенде тұрған кез-келген көйлекті тапсырыс берушінің дене бітіміне, бойына лайықтап айнытпай тіге аламын. Осы салада жұмыс істеп жатқаныма 15 жыл болып қалды, – дейді тігінші. – Эстрада әншілері келіп тапсырыс береді. Той, жиынға баратын қалталы апайлардың көйлегін тігіп беремін. Ал мамыр айының басынан маған мектеп бітіруші қыздар келеді. Мен матаның бағасына қарай ақы аламын. Яғни 3 мың теңгелік матадан үш метр әкелсе, мен тігу ақысы үшін 9 мың теңге аламын. Жуырда бір «клиентім» қызына көйлек тіктірді. «Мадонна» деп аталатын мата әкеліпті. Тізеден төмен, иығы ашық, әр жеріне асыл тастар тігілген көйлекті тігу ақысына 15 мың теңге алдым. Тапсырыс көп. Тігіп үлгере алмай жатырмын».

Қалталы, жағдайы жақсы адамдардың көбіне дүкендерден, ірі сауда орталықтарынан киім алатыны белгілі. «Евразия» базарында 10-15 мың теңгеден көйлек жоқ. Ең арзан көйлек 18 мың теңге тұрады екен. Алайда сатушылар кешкі көйлектерге деген сұраныстың аздығын айтуда.

«Ілуде бір адам алмаса көйлектерімізге деген сұраныс аз. Түркиядан қымбат келгендіктен, оны арзан бағаға сата алмаймыз. Жеңілдіктер жасап тұрамыз. Мәселен, мына қоңыр түсті юбка-костюмнің бағасы 42 мың теңге тұрады. Былтыр көктемде әкелгенмін. Біреуі-ақ сатылды. Енді осы бітіруші түлектердің «банкетін» ескеріп, 35 мың теңдеген сатпақпын», – дейді Гүлнәр есімді кәсіпкер.

Иә, киім сататын дүкендерде бағасы да, сапасы да жоғары киімдер өте көп. Алайда оны алуды кез-келген адамның қалтасы көтере бермес. Ендеше, кигенде жарасымды, денеге қонымды, көрінісі әдемі әрі бағасы қалта көтерерліктей көйлектерді таңдаған жөн болар. Себебі бұл күні қыздар бір ғана көйлек алып қоймайды, шашын әсемдетеді, көйлегіне сәйкес аяқ киім алады. Оның бәрі қыруар ақша тұрады емес пе?

С. ИКРАМҚЫЗЫ.

Пікір қосу

JComments